वीरगञ्ज । कृषि तथा पशुपन्छी विकास मन्त्री डा. मदनप्रसाद परियारले सरकारी अनुदानको रासायानिक मल वितरण प्रणाली किसानमैत्री र न्यायोचित ढङ्गले वितरण गर्न आवश्यक पर्ने अनलाइन संरचना विकास गर्न लागिएको बताएका छन् । मन्त्री परियारले रासायनिक मल अब ‘अनलाइन सिस्टम’ बाट ल्याइने तयारी भइरहेको जानकारी दिए । पर्सा र बाराका कृषि र पशुपन्छीसँग सम्बन्धित सरकारी कार्यालयको निरीक्षण तथा किसानहरूसँगको छुट्टाछुट्टै भेटघाटमा मन्त्री परियारले रासायनिक मल वितरण प्रणालीमा कतै न कतै समस्या भएकाले वितरण प्रणाली वास्तविक कृषकमैत्री बनाउन खोजेको जानकारी दिए । सरकारले अनुदानमा उपलब्ध गराएको मल वास्तविक किसानले सहज र न्यायोचित ढङ्गले प्राप्त गर्न नसकिरहेको गुनासा आइरहेको बेला अनलाइन सिस्टम बाट मल आएपछि किसानको मल नपाउने समस्या समाधान हुने उनको विश्वास थियो । मन्त्री परियारले त्यस्ता खालका गुनासालाई सम्बोधन गर्न अनलाइन प्रणालीबाट कुन किसानले कति परिमाणको मल प्राप्त गर्नुभयो भन्ने अनलाइन प्रणाली विकास गर्न जुटेको र सम्भवतः सो कार्य छिट्टै सञ्चालनमा ल्याइनेछ,’ उनले भने, ‘सरकारले ठूलो धनराशिको रासायनिक मल खरिद गरेर किसानलाई अनुदानका रूपमा सस्तो मूल्यमा उपलब्ध गराउँदै आइरहेको छ । तर, अनुदानको मल वितरण प्रणालीमा कतै न कतै समस्या कायमै छ । कमजोरी सुधार्न खोजिरहेका छौँ ।