सिन्धुपाल्चोक – वाग्मती प्रदेशका मुख्यमन्त्री राजेन्द्रप्रसाद पाण्डेले बाढीले क्षति र्पुयाएको मेलम्ची क्षेत्रका बस्ती जोगाउन आवश्यक बजेट निकाशा गर्ने बताएका छन् ।
शनिबार बाढीक्षेत्र हेलम्बु गाउँपालिका र मेलम्ची नगरपालिका पुगेका मुख्यमन्त्री पाण्डेले पीडितको ज्ञापन पत्र बुझ्दै बस्ती जोगाउन आवश्यक बजेट निकाशा गर्ने बताएका हुन् । पाण्डेले मेलम्ची क्षेत्रका बस्ती जोगाउन भू संरक्षणमार्फत प्रथम चरणमा चार करोड निकासा भएको समेत बताए । ‘तपाँईहरुको गुनासो सुनें, तत्कालका लागि नदी नियन्त्रण तथा बस्ती संरक्षणका लागि भू संरक्षणमार्फत चार करोड बजेट निकासा भएको छ, फेरी लगत्तै १० करोड थप गर्ने योजना बनाएका छौं,’ बाढीपीडितलाई भेट्दै मुख्यमन्त्री पाण्डेले भने ।
गत असार १ मा हेलम्बुको शिरभेग भेमाथाङबाट उर्लिएको बाढीले बगर तुल्याएको हेलम्बु र मेलम्ची तटीय भेगक्षेत्र अवलोकन गर्दै मुख्यमन्त्री पाण्डे भावविहृवल भएको स्थानियले बताएका छन् । मेलम्ची खोलामा आएको बाढीले हेलम्बु र मेलम्ची तटभेग ध्वस्त तुल््यायो, एक दर्जन गाउँको अस्तित्व मेटाइदिएको थियो । बाढीबीच हेलम्बु गापा र मेलम्ची खानेपानी आयोजनामा कार्यरत कर्मचारी गरी पाँच जनाले ज्यान गुमाएका थिए । उक्त बाढीमा परेका २० जना अझै भेटिएका छैनन् ।
बाढी गएको लामो समयसम्म सरकारले बाढीपीडितको लागि उल्लेख्य काम केही गर्न नसकेको भन्दै हेलम्बु र मेलम्चीका बाढीपीडितले मुख्यमन्त्रीलाई गुनासो पोखेका थिए । बाढीपीडित सरोकार समिति सहितका स्थानीयहरुले जम्मा भएर ज्ञापन पत्र बुझाउँदै बाढीले बगर तुल्याएको र अन्य बासको अन्योलता मुख्यमन्त्रीलाई पोख्दै अनेक मागसहित गुहारेका थिए ।
स्थानियको गुनाशोपछी मुख्यमन्त्री पाण्डेले बाढीले यस भेगमा दुखद् घटना गराएको र तत्काल आवश्यक अध्ययन गरी पहलकदमी र काम थाल्न सम्बन्धित निकायलाई निर्देशन दिएको बताएका थिए । मुख्यमन्त्री पाण्डेसहित वाग्मती प्रदेशका स्वास्थ्यमन्त्री निमा लामा, पशुपंक्षी राज्यमन्त्री इन्द्रमाया गुरुङ, पूर्वसामाजिक तथा विकासमन्त्री युवराज दुलाललाई सहजीकरण गर्नसमेत उनले अनुरोध गरेका थिए । ‘५० लाखभन्दा बढी बजेटको ठेक्का गर्नुपर्ने प्रदेशको प्रावधान छ, बाढी प्रभावित हेलम्बु , मेलम्ची र पाँचपोखरी थाङपाल गांउपालिकामा ५०/५० लाखको योजना बनाएर उपभोक्ता समितिमार्फत काम गर्नुहोस् ।, ’उनले भने ।
उता मेलम्ची डुवान प्रभावित क्षेत्रको अनुगमनमा पुगेका मुख्यमन्त्री पाण्डेलाई विज्ञको सुझावको आधारमा तयार पारिएको मेलम्ची नगरपालिकाको प्रतिवेदनको बारेमा मेलम्ची नगरका मेयर डम्बर अर्यालले जानकारी गराएका थिए ।
