काठमाडौ । नेपाली किसानका लागि राहत हुने गरी बालेन नेतृत्वको सरकारले रासायनिक मल आपूर्तिमा महत्वपूर्ण निर्णय गरेको छ। सोमबार बसेको मन्त्रिपरिषद् बैठकले कृषि सामग्री कम्पनी लिमिटेडलाई भारतसँग ‘जीटुजी’ (सरकार–सरकार) प्रक्रियामार्फत रासायनिक मल खरिद गर्न सैद्धान्तिक सहमति प्रदान गरेको हो । निर्णयअनुसार कम्पनीले ६० हजार टन युरिया र २० हजार टन डीएपी मल भारतबाट आयात गर्नेछ । यस निर्णयसँगै अब कृषि सामग्री कम्पनीले भारतसँग समन्वय गरी सिधै मल आयात गर्ने बाटो खुला भएको छ। सरकारको यो कदमले दीर्घ समयदेखि देखिँदै आएको मल अभाव र आपूर्ति ढिलाइ अन्त्य हुने अपेक्षा गरिएको छ। किसानले समयमा मल पाउने व्यवस्था सुनिश्चित गर्न गरिएको यो निर्णयलाई कृषि क्षेत्रका लागि सकारात्मक कदमका रूपमा हेरिएको छ ।