काठमाडौं — कृषि, वन तथा पर्यावरणमन्त्री गीता चौधरीले नेपालले विदेशबाट अर्बौं रुपैयाँको रासायनिक मल आयात गर्नुपर्ने अवस्थाको अन्त्य गर्नुपर्नेमा जोड दिएकी छन्। शुक्रबार सिंहदरबारमा बसेको प्रतिनिधिसभा अन्तर्गतको कृषि, सहकारी तथा प्राकृतिक स्रोत समिति बैठकमा बोल्दै उनले स्वदेशमै मल उत्पादन गर्ने कारखाना स्थापना वा अन्य वैकल्पिक उपाय विकास गर्नुपर्ने आवश्यकता औंल्याइन्। मन्त्री चौधरीका अनुसार हाल मल खरिदमा मात्रै मन्त्रालयको झण्डै ५० प्रतिशत बजेट खर्च भइरहेको छ, जसले कृषि क्षेत्रको दीर्घकालीन विकासमा बाधा पुर्‍याइरहेको छ। उनले विदेशी मलमा निर्भरता घटाएर स्वदेशमै उत्पादन वृद्धि गर्न सके कृषि क्षेत्रको बजेटलाई अन्य विकासात्मक काममा उपयोग गर्न सकिने बताइन्। कृषि पेशालाई आकर्षक र आधुनिक बनाउन नीतिगत सुधार अघि बढिरहेको उल्लेख गर्दै उनले किसानलाई प्रविधिसँग जोड्ने, उत्पादनलाई बजारसम्म पुर्‍याउने र राज्यले आवश्यक सहजीकरण गर्ने प्रतिबद्धता दोहोर्याइन्।