कञ्चनपुरको शुक्लाफाँटा नगरपालिका–१० सिमलखेतमा विपन्न दलित समुदायलाई आत्मनिर्भर बनाउने उद्देश्यले सुरु गरिएको तालिम कार्यक्रमले स्थानीयमा नयाँ उत्साह ल्याएको छ।
सुदूरपश्चिम प्रदेशअन्तर्गत सामाजिक विकास कार्यालय कञ्चनपुरको चालु आर्थिक वर्षको कार्यक्रमअनुसार २५ जना दलित समुदायका सहभागीलाई बाख्रा तथा कुखुरापालनसम्बन्धी सातदिने व्यावहारिक तालिम दिइँदैछ।
तालिमको मुख्य लक्ष्य सहभागीलाई केवल सीप सिकाउनु मात्र नभई उनीहरूलाई स्वरोजगारतर्फ उन्मुख गराउँदै आर्थिक जीवनस्तर उकास्नु रहेको कार्यालयले जनाएको छ।
कार्यालय प्रमुख भीमबहादुर बुढाका अनुसार कार्यक्रमले विपन्न समुदायलाई “सीपसँगै आम्दानी” जोड्ने अवसर प्रदान गर्नेछ। उनका शब्दमा, “विज्ञ प्रशिक्षकमार्फत व्यवहारिक तालिम दिइँदैछ, जसले सहभागीलाई सानो लगानीमै व्यवसाय सुरु गर्न सक्षम बनाउनेछ।”
वडा कार्यालयको समन्वयमा अतिविपन्न दलित परिवार छनोट गरी तालिममा सहभागी गराइएको हो। कार्यक्रमले ग्रामीण स्तरमै रोजगारी र आयआर्जनका सम्भावना विस्तार गर्ने अपेक्षा गरिएको छ।
स्थानीयस्तरमै सुरु गरिएको यस्तो पहलले दीर्घकालीन रूपमा समुदायको आर्थिक अवस्थामा सकारात्मक परिवर्तन ल्याउने विश्वास सरोकारवालाले व्यक्त गरेका छन्।
