झापाको मेचीनगरबाट प्रकाशित लोकतन्त्र पोस्टले एक सय पृष्ठको रंगिन विशेषांक (लोकतन्त्र मेगेजिन) प्रकाशित गरेको छ ।

लोकतान्त्रिक गणतन्त्र स्थापनाका लागि १४ वर्ष केपी ओली सँगै जेल जीवन बिताएका सानो दुर्गा अधिकारीको आवरण तस्बिर रहेको मेगेजिन सोमबार सानू दुर्गा अधिकारी र २०६२/०६३ को जनान्दोलनमा सेनाको गोली लागेर घाइते भएका गोपाल श्रेष्ठसहित मेचीनगरका १२ जना पत्रकारहरुले संक्षिप्त कार्यक्रमबीच संयुक्त रुपमा लोकार्पण गरेका छन्।
लोकतन्त्र पोस्ट दैनिकले बिगत आठ वर्षदेखि वार्षिक रुपमा रंगिन मेगेजिन प्रकाशित गर्दै आएको छ । हरेक वर्ष दसैंमा प्रकाशित हुँदै आएको मेगेजिन यसपाली तिहारमा प्रकाशित भएको पत्रिकाका सम्पादक तथा प्रकाशक मोहन काजीले बताए ।

एक सय पृष्ठ रहेको यसपालीको मेगेजिनको कभर थिम ‘व्यवस्था फेरियो, अवस्था उस्तै’ भन्ने रहेको छ ।

‘थुप्रै व्यवस्था फेरिदा पनि आम जनताको जीवनस्तरमा परिवर्तन आउन नसकेको विषयलाई जोडदार रुपमा उठाउनु यसपालीको मेगेजिनको उद्देश्य हो,’ काजीले भने–‘राज्यको नीति निर्माता र नेतृत्वदायी जिम्मेवारीमा रहेकाहरुलाई खबरदारी गर्न सक्यौं भने हामी सफल भएको ठान्नेछौं । मेगेजिनको सन्देश पनि यही हो ।’
मेगेजिनभित्र राष्ट्रगानका रचयिता व्याकुल माइला, चराखोजकर्ता देबेन्द्र खरेल,सप्तकोशी विकास बैंकका कामु सीइओ दिनेश पोखरेल,क्यान्सर रोग विशेषज्ञ डा. वीरेन्द्र यादव र नेत्ररोग विशेषज्ञ डा. जेनु शैजुको विशेष र रोचक अन्तरवार्ता प्रकाशित छ ।
यसैगरी, प्रख्यात राजनीतिक विश्लेषक डम्बर खतिवडा, डा. अरुणा उप्रेती, कमन देवान लगायतको फरक धारका विशेष लेख प्रकाशित रहेका छन् भने
जनार्दन दाहाल र विन्दु अधिकारीको साहित्यिक रचना समेत समेटिएको छ । राजकुमार दिक्पाल, अम्बिका भण्डारी, अर्जुन कार्की र रेवतिराज घिमिरेको खोजमूलक लेख प्रकाशित छ।